Веб пребарувачи

Google

Mоже да се користи со посета на веб страницата www.google.com. Го креирале Лари Пејџ и Сергеј Брин на Стенфорд Универзитетот во Америка во 1998 год. Името Google доаѓа од зборот googol, кој во математиката означува 1 следен од 100 нули.

Yahoo

Mоже да се користи со посета на веб страницата search.yahoo.com.

MSN

Mоже да се користи со посета на веб страницата www.msn.com.

Ask.com

Mоже да се користи со посета на веб страницата www.ask.com.

Овие машини за пребарување нудат можност да се бараат веб страници, слики, мапи или видео клипови со одредена содржина.

 Начин на пребарување:
- пребарување по категории (теми)
- пребарување со клучни зборови

Пребарување по категории (директориуми).

Кога се пребарува по категорија (образование, наука, забава, спорт, здравје, шопинг итн.) потребно е од листата на понудени категории да се избере онаа каде припаѓа она што не интересира или категоријата може да се напише во полето за пребарување. Потоа може да се прикажат подкатегории или листа на адреси на веб страници со содржини од бараната тема.

Пребарување по клучни зборови

Пребарувањето по клучен збор овозможува пронаоѓање на потребните информации со пишување на клучен збор или реченица.

Клучен збор е збор кој го опишува поимот кој се бара.

На пример, зборот “Elephant” е клучен збор кој ќе не однесе на веб страници кои го содржат тој збор. Тие веб страници може да бидат за животното слон, но може да бидат и за филмови, списанија, фирми, ресторани и слично кои на своите веб страници го користат тој збор.

Кога се пребарува по клучен зборо потребно е:

• прецизно избирање на зборот кој го опишува поимот кој се пребарува,

• кога се користи повеќе од еден клучен збор, поважниот збор се пишува прв,

• клучните зборови треба да се напишат правилно затоа што од тоа ќе зависи добиениот резултат од пребарувањето.

Најпознат пребарувач по клучен збор е Google со адреса www.google.com.

Значење на прикажаните резултати од пребарувањето

- Како резултат на пребарувањето се добива листа со веб адреси кои го содржат поимот кој се бара во форма каква што го бара корисникот (текст, слика, видео и др.) Најголема е веројатноста за наоѓање на бараните содржини кај првите дваесетина веб страници од листата добиена по пребарувањето.

- Секој резултат од листата го прикажува насловот на веб страницата, ако го има. Со кликање на насловот се отвора страницата.

- Под насловот следуваат првите неколку реда од текстот на страницата кои често помагаат во донесување одлука дали страницата го има или не она што се бара.

- Потоа следи веб адресата на страницата.

- На крајот ја пишува големината на страницата или сликата во бајти.

Работа со слики (објекти) од веб страница

Копирање или снимање на слика од веб страница се прави со десен клик врз сликата од веб страницата.

“Copy Image“ - ископираната слика со paste може да се постави во друг документ.

Снимање на слика од веб страница се прави со десен клик врз сликата од веб страницата.

“Save Picture As“ и се избира локацијата за меморирање на сликата.

Задача: Одговори ги следниве прашања најкасно до 4.06.2020 год.

1. Дали постои начин за пронаѓање на веб страници,слики, видео клипови и сл. со одредена содржина поставени на Интернет?

2. Кои се најпопуларни машини за пребарување денес на Интернет?

3. Кои се адресите на веб страниците преку кои машините за пребарување ги нудат своите услуги?

4. Како се пребарува по категорија?

5. Како се пребарува по клучен збор?

6. Кои се правилата за избор на клучен збор?

7. Како се подредени резултатите од пребарувањето кои ги дава машината за пребарување?

8. Што е прикажано во добиените резултатите од пребарувањето?

Веб прелистувачи

Што се Веб прелистувачи?

Програмата за отворање, разгледување и движење „сурфање“ низ различни веб страници од веб сајтовите се вика веб прелистувач (Web browser).

Веб страниците се отвараат во веб прелистувачите со впишување на нејзината адреса во специјално поле за адреси.

Познати Веб прелистувачи - Web Browser

Постојат голем број на веб прелистувачи, но најпопуларни се: Google Chrome,  Mozilla Firefox, Microsoft Internet Explorer, Opera, Safari...

На еден компјутер може да има инсталирано неколку различни веб прелистувачи. Корисникот може да избере со кој од нив ќе работи или може да ги користи истовремено.

Елементи на Веб прелистувачите

1. Лента за име на прикажаниот веб сајт и име на веб прелистувачот.

2. Мени за работа со приказот на веб страниците во веб прелистувачот.

- File може да се отвараат јазичиња, да се меморира или печати прикажана веб страница и сл.

- View може да се избираат алатките кои ќе се прикажуваат во лентата со алатки, да се зумира погледот на веб страницата и сл.

- Bookmarks (Favorites) може да се креираат листи на адресите на веб страниците кои корисникот сака повторно да ги посети. На овој начин не мора да ги памти, ниту да ги пишува, туку едноставно од Bookmarks ќе ги избира со клик.

- History може да се креира листа на веб страниците кои се посетени во период, на пример, од последната недела, месец и сл.

3. Алатки за работа со приказот на Веб страниците во Веб прелистувачот

Back – враќа на претходно посетена страница.

Forward – враќа на страницата од која корисникот се вратил на претходната.

Reload или Refresh – ја „полни“ повторно истата страница затоа што првиот обид бил неуспешен, се одвивал многу споро или не завршил потполно.

Stop – го прекинува вчитувањето на веб страницата ако, на пример, вчитувањето оди многу споро и слично.

Home – ја прикажува почетната страница на веб разгледувачот.

4. Поле за внесување на адреса на веб страница. 

Адресата се внесува со тастатура со англиска поддршка.

5. Страницата со внесната адреса започнува да се полни откако ќе се притисне копчето Enter на тастатурата. При внесување на веб адресата во веб прелистувачот не е важно дали ќе се напише со мали или големи букви.

http://www.ohrid.org.mk = HTTP://WWW.OHRID.ORG.MK

6. Покажувач на пристап до веб страница со внесена адреса. Покажувачот е анимирана сликичка (прозорец кој се вее, стрелка која врти во круг и сл.). Кога е активна тоа значи дека веб прелистувачот се обидува да му пристапи на компјутерот на кој се наоѓа веб страницата.

7. Покажувач на статусот е правоаголно поле кое постепено се полни со квадратчиња и така може да се следи до каде е полнењето на саканата веб страница во веб прелистувачот.

8. Дел за прикажување на содржината на веб страницата

9. Јазичиња во кои се отворени различни веб страници во истиот прозорец на веб разгледувачот. Во одредено време може да биде активен и да се разгледува веб страницата во еден таб.

Активност1: Одговори ги прашањата во тетратка и решението испрати го до петок (29.05.2020)

1. Како се викаат програмите за разгледување на веб страници?

2. Наброј ги имињата на најпознатите програми за разгледување на веб страници!

3. Дали може на еден компјутер да има повеќе различни програми за

разгледување на веб страници?

4. Дали може да се користат паралелно различни програми за

разгледување на веб страници?

5. Кои се алатките во прозорецот на секој веб прелистувач за движење и

работа со веб страниците?

6. Што овозможува алатката History?

7. Што овозможува алатката Favorites (Bookmarks)?

8. За што служи полето address?

9. Што се тоа покажувачи на пристапот до веб страницата, а што покажувачи на статусот?

Додавање ефекти на презентација

Додавање звук и видео во презентација

Во мултимедијалната презентација можат да се додадат видео клипови кои се наоѓаат online, но и клипови кои се зачувани на мемориските уреди на компјутерот.

При додавање на звук во презентацијата имаме избор да додадеме звучен фајл кој се наоѓа на компјутерот или пак да снимиме звучен фајл преку апликациите на компјутерот. При додавање на звук или видео на мени лентата се појавуваат доплнителни менија за уредување на овие фајлови.

Поим за визуелни и звучни ефекти во презентација

Во презентацијата може да се воспоставуваат звучни и визуелни ефекти

Визуелните ефекти можат да бидат поставени како:

• ефекти на премин меѓу слајдовите (ефект на транзиција) или
• ефекти на анимација - движење на објектите поставени на слајдот

Звучните ефекти најчесто се пропратни ефекти на видео ефектите.

Ефекти на транзиција

Ефектите на премин или транзиција се визуелни ефекти кои се појавуваат при премин од еден на друг слајд.
Овие ефекти овозможуваат сигнализирање на корисниците на презентацијата дека ќе бидат прикажани нови информации, нов слајд.
Програмите за креирање презентации овозможуваат доделување ист ефект на премин за сите слајдови во презентацијата или различни ефекти на транзиција за секој слајд. За ефектите на премин може да се избере брзина, звук и начин на активирање.

Ефекти на анимација

Анимација е брзо менување на приказот на голем број слики една по друга при што се добива ефект на движење на објектот прикажан на сликите. Анимациите според движењето на објектот на слајдот се поделени на 4 видови:

• влез на објектот на слајдот.

• нагласување на објект на слајдот.

• објектот го напушта слајдот.

• објектот на слајдот опишува избрана патека.

За анимациите во зависност од категоријата на која и припаѓаат може да се изберат параметри како што се: брзина, начин и редослед на појавување, насока, изглед на патека, големина и сл.

На секој објект на слајдот може да му се додели ефект на анимација.

За  да додадеме анимации на објектите од слајдот најпрво го селектираме објектот, а потоа избираме начин на движење односно анимација преку менито Animations и опцијата Add Animation. Од прозорецот можеме да избереме некоја од најчесто користените, но може и да избереме преку опцијата More која се наоѓа на долниот дел од прозорецот. Поставените анимации во панелот на десната страна можеме да ги реорганизираме, односно да им дадеме друг редослед, да ги бришеме и да им додаваме дополнителни опции од типот кога да се појават и на кој начин.

Внесување хиперврски

Преку менито Insert можеме да додадеме рамки за текст, готови објекти, звук, видео, линкови итн.

Линкови или хиперлинкови претставуваат врски до други места. Преку менито Insert - Hyperlink, можеме да поставиме линк до одредено место. Постојат линкови кои можат да не поврзат до 4 места: до постоечки фајл или веб страница, до место или објект во истиот документ, до нов документ или до некоја е-маил адреса.

Акциски копчиња

Алатката Action ни нуди можност да поставиме одредена акција при кликнување на текст, копче или некој објект. Притоа при извршување на акцијата можеме да преминеме на друг слајд, да повикаме одредена програма, да се вратиме на почетокот на презентацијата и слично. Акцијата може да се активира со кликнување на глувчето (mouse click) или пак само со поминување над местото каде е поставена акцијата (mouse over). Исто така преку опцијата Insert – Shapes можеме да додадеме готови облици и притоа да им дадеме акции како акциски копчиња, односно да вршат одредена акција.

Пред да ја изработете домашната задача, погледнете го видеото за Додавање ефекти во презентација:

Додавање ефекти во презентација

Домашна задача:

Изработете презентација која ќе содржи 5 слајдови. 

        Првиот ќе биде насловен како Моите омилени нешта...

        Вториот ќе има наслов Моето омилено хоби, и секој ќе запише што е неговото хоби (може да се читање книги, слушање музика, спорт,... и слики поврзани со тоа хоби

       Третиот слајд со налов Моето милениче, и секој ќе напише дали има или нема милениче. Ако има кое е, како се вика, слика..., а ако нема што би сакал да има и слика од тоа што би сакал да му е милениче.

       Четвртиот слајд да биде Мојот омилен училишен предмет, и секој да запише кој е неговиот училишен предмет, и слика поврзана со тој предмет.

       Петтиот слајд нека е завршен со информација за тоа кој ја изработил презентацијата.

Да се постави:

• дизајн на секој слајд,
• ефект на транзиција
• ефект на анимација на барем еден објект од секој слајд
• акциско копче, односно хиперлинк (Home) кое ќе не носи од последниот до првиот слајд.

Зачувајте ја со име Moite omileni nesta во твојот компјутер и испрати ја најкасно до петок (8.05.2020) по Viber или e-mail (viktorija.poposka@gmail.com)